پنجاب میں 45لاکھ درخت لگانے کا میگا شجرکاری پراجیکٹ تیار

فیصل آباد (نیوز لائن) پنجاب حکومت نے صوبے میں شجرکاری کا میگا پراجیکٹ تیار کیا ہے۔ میگا شجرکاری پراجیکٹ تحت ایک سال کے دوران صوبہ بھر میں محکمہ جنگلات کی پانچ ہزار ایکٹر خالی اراضی پر45 لاکھ پودے لگائے جائیں گے۔ منصوبے پر20کروڑ روپے لاگت آئے گی۔ نیوز لائن کے مطابق صوبہ بھر میں سب سے زیادہ ساڑھے 13لاکھ درخت فیصل آباد سرکل میں لگانے کا فیصلہ کیا گیا ہے۔ فیصل آباد میں اس کیلئے محکمہ جنگلات کی ڈیڑھ ہزار ایکڑ اراضی استعمال کی جائے گی۔نیوز لائن کے مطابق فیصلہ کیا گیا ہے کہ مہم کے دوران سفیدہ کے پودے نہیں لگائے جائیں گے اور صرف شیشم‘ کیکر‘نیم‘ بکائین‘ سنبل‘ بیر‘ جامن اور دیگر اقسام کے پودے لگائے جائیں گے۔ ہزاروں ایکٹر خالی اراضی پر لاکھوں نئے پودے لگانے سے نہ صرف صوبہ میں درختوں کی کمی کو پورا کرنے میں مدد ملے گی بلکہ اس سے ماحولیاتی آلودگی کو بھی کم کیاجاسکے گا۔

Related posts