سٹرکچر ٹیکس کیخلاف وکلاء کی ہڑتال جاری‘ ریونیو دفاتر کی تالا بندی


فیصل آباد (نیوزلائن)زمین کی رجسٹری کے وقت سٹرکچر ٹیکس کی ادائیگی اور اراضی کے نقشہ جات لگانے کی شرط کیخلاف فیصل آباد کے وکلاء کی ہڑتال ایک ماہ سے جاری ہے۔ وکلاء نے اپنے احتجاج کو بڑھاتے ہوئے اے ڈی سی ریونیو کی متعدد برانچوں اور تحصیل دفاتر کوبھی تالے لگا دئیے ہیں۔ اس سے پہلے اراضی ریکارڈ سنٹر‘ سٹی وصدر سب رجسٹرار کے کورٹ روم‘ پٹواریوں کے دفاتر، ایڈیشنل ڈسٹرکٹ کلیکٹر کے ریکارڈ روم اور ٹی ایم اے منتقلی فیس کے دفاتر کو بھی تالے لگا چکے ہیں۔ اس معاملے کو حل کرنے کیلئے وکلاء اور ضلعی انتظامیہ کے مذاکرات کئی بار ناکام ہوچکے ہیں۔ وکلاء معاملہ حل نہ ہونے پر آئندہ دو روز میں اے ڈی سی ریونیوکے آفس کی تالا بندی کرنے کی پلاننگ کررہے ہیں۔ایک ماہ سے اراضی کے لین دین‘رجسٹری‘ انتقال اراضی سمیت تمام امور ٹھپ ہیں جسکے باعث سرکاری خزانہ کو کروڑوں روپے کے نقصان کا سامنا ہے جبکہ شہری بھی شدید پریشانی کا شکار ہیں۔

Related posts