میڈیا پر سنسر شپ کیخلاف ایف یوجے نے ’’ بلیک ڈے‘‘ منایا


فیصل آباد(نیوزلائن)ضیاء الحق کے مارشل لاء میں میڈیا پر بدترین پابندیاں عائد کئے جانے کیخلاف فیصل آباد یونین آف جرنلسٹس نے بلیک ڈے منایا۔ ایف یو جے کے ارکان نے بازوؤں پر سیاہ پٹیاں باند ھ کر احتجاج ریکارڈ کروایا۔ جبکہ ایف یو جے کی کیمپ آفس پر سیاہ پرچم لہرایا گیا۔ اس موقع پر اظہار خیال کرتے ہوئے فیصل آباد یونین آف جرنلسٹس کے صدر طاہر رشید‘ جنرل سیکرٹری ندیم جاوید اور پاکستان فیڈرل یونین آف جرنلسٹس کے سابق اسسٹنٹ سیکرٹری حامد یٰسین نے کہا کہ ضیاء الحق دور کی بدترین سنسر شپ کا دور ابھی بھی ختم نہیں ہواصرف اس کا طریقہ کار بدل گیا ہے۔ میڈیا آج بھی پابندیوں میں جکڑا ہوا ہے۔ میڈیا کارکن پہلے سے زیادہ دباؤ کا شکار اور پابندیوں میں جکڑ دیا گیا ہے۔ ضرورت اس امر کی ہے کہ پرنٹ اور الیکٹرانک میڈیا کو مکمل آزادی دینے کیلئے قانون سازی کی جائے۔ میڈیا کیخلاف اوچھے ہتھکنڈے استعمال کرنے والوں کیخلاف قانون کو متحرک کیا جائے۔ اور آئین پاکستان کے مطابق اظہار رائے کی آزادی یقینی بنائی جائے۔

Related posts